کیا یہی اسلام ہے؟

کیا یہی اسلام ہے؟

تحریر: پروفیسر ڈاکٹر پرویز اقبال آرائیں

مسلمانوں پر ہونے والے مظالم کی وجہ بھی صرف فرقہ واریت ہے جس کی قرآن و سنت میں ممانعت ہے اور اس پر جہنم کی وعید ہے۔ اسی طرز فکر و عمل نے امت مسلمہ کا شیرازہ بکھیر کر اسے ذلت و رسوائی، تباہی و بربادی، انتشار و افتراق، باہمی منافرت، معاشی و معاشرتی اور سیاسی زبوں حالی، انحطاط و تنزلی اور پستی کی اس صورتحال تک پہنچایا ہے۔ اس فرقہ پرستی نے دین اسلام اور امة مسلمه کو وہ ناقابل تلافی و ناقابل بیان نقصانات پہنچائے ہیں کہ جن کا کوئی تصور بھی ممکن نہیں ہے۔ یہود و ہنود، نصارٰی و کفار اور مشرکین و مرتدین سمیت جمیع طاغوتی قوتیں باہمی اشتراک و تعاون اور اپنے وسائل کو یکجا کر کے بھی قیامت تک کبھی مسلم امه کو ایسے شدید و سنگین اور ناقابل تلافی نقصانات نہیں پہنچا سکتے تھے، جو اس فرقہ پرستی و فرقہ اکابرین کی اکابر پرستی نے پہنچائے ہیں، اسی کی وجہ سے آج آلا ماشآء الله! اکثر و بیشتر کلمہ گو برملا، قرآن و سنة سے صریح انحراف و روگردانی اور سرکشی کرتے نظر آتے ہیں، اسی فرقہ پرستی کے رجحانات اور روش و رویوں کے باعث آج اخوت اسلامی کے حکم کے برعکس ہر فرقے کا کلمہ گو دوسرے تمام فرقوں کے پیروکاروں کو فاسق و فاجر، کافر و مشرک، مرتد اور واجب القتل سمجھتا ہے، کوئی دوسرے فرقے کی مسجد میں نہیں جاتا، کوئی دوسرے فرقے کے مدرسے میں اپنے بچوں کو داخل نہیں کرواتا، دین حق ,*"الاسلام"* نے تو حکم دیا ہے کہ ہر مسلم دوسرے مسلم کا بھائی ہے، جو چیز اپنے لیے پسند کرو، چاہیے کہ وہی دوسرے مسلم بھائی کےلیے بھی پسند کرو، مسلم وہ ہے جس کے ہاتھ اور زبان سے دوسرے مسلمون محفوظ ہوں، آج جو فرقہ پرست لوگ دوسرے فرقے کے لوگوں کو کفار و مشرکین، یہود و نصارٰی اور ہندو و سکھ وغیرہم سے بدتر، قابل نفرت اور واجب القتل تک سمجھتے ہیں تو آپ کے خیال میں کیا یہی اسلام ہے؟